ఎండలు రోజురోజుకీ తీవ్రరూపం దాల్చుతున్న నేపథ్యంలో Department of Women Development and Child Welfare కీలక నిర్ణయం తీసుకుంది. అంగన్వాడీ సిబ్బంది ఆరోగ్యాన్ని దృష్టిలో ఉంచుకుని దశలవారీగా వేసవి సెలవులు ప్రకటించింది. ఈ నిర్ణయం రాష్ట్రవ్యాప్తంగా వేలాది మంది అంగన్వాడీ కార్యకర్తలు, ఆయాలకు ఉపశమనంగా మారింది.
ప్రకటన ప్రకారం మే 1 నుంచి మే 15 వరకు అంగన్వాడీ కార్యకర్తలకు సెలవులు కల్పించగా, మే 15 నుంచి నెలాఖరు వరకు ఆయాలకు సెలవులు ఇవ్వనున్నారు. తీవ్రమైన ఉష్ణోగ్రతల మధ్య పనిచేస్తున్న సిబ్బందికి విశ్రాంతి అవసరమనే ఉద్దేశంతో ఈ నిర్ణయం తీసుకున్నట్లు అధికారులు తెలిపారు.
అయితే, అంగన్వాడీ కేంద్రాలు మాత్రం మూసివేయబడవు. పిల్లలకు అందించే పోషకాహారం, ఆరోగ్య సేవలు, ఇతర సంక్షేమ కార్యక్రమాలు యథావిధిగా కొనసాగుతాయని స్పష్టం చేశారు. అవసరమైన ఏర్పాట్లు చేసి సేవలు నిలిపివేయకుండా చూసుకుంటామని అధికారులు పేర్కొన్నారు.ఈ నిర్ణయం వల్ల సిబ్బందికి ఉపశమనం లభించడంతో పాటు, పిల్లల సేవల్లో ఎటువంటి అంతరాయం కలగకుండా ప్రభుత్వం చర్యలు తీసుకోవడం విశేషంగా భావిస్తున్నారు.
