77వ భారత గణతంత్ర దినోత్సవాన్ని పురస్కరించుకుని తెలంగాణ రాజ్యాధికార పార్టీ (టీఆర్పీ) కార్యాలయంలో ఘనంగా వేడుకలు నిర్వహించారు. ఈ సందర్భంగా పార్టీ అధినేత, ఎమ్మెల్సీ తీన్మార్ మల్లన్న జాతీయ జెండాను ఆవిష్కరించి వేడుకలను ప్రారంభించారు. అనంతరం జాతీయ గీతం ఆలపించి దేశ ప్రజలకు గణతంత్ర దినోత్సవ శుభాకాంక్షలు తెలియజేశారు.
ఈ సందర్భంగా ఆయన మాట్లాడుతూ, భారత రాజ్యాంగం ప్రజలకు ఇచ్చిన హక్కులు, స్వేచ్ఛలు, సమానత్వం ఎంతో విలువైనవని అన్నారు. రాజ్యాంగ విలువలను కాపాడుతూ ప్రజాస్వామ్యాన్ని బలోపేతం చేయడం ప్రతి రాజకీయ పార్టీతో పాటు ప్రతి పౌరుడి బాధ్యత అని పేర్కొన్నారు. ప్రజల హక్కుల సాధన, సామాజిక న్యాయం కోసం టీఆర్పీ పార్టీ నిరంతరం పోరాటం కొనసాగిస్తుందని ఆయన స్పష్టం చేశారు.
ఈ కార్యక్రమంలో పార్టీ నాయకులు, కార్యకర్తలు, కార్యాలయ సిబ్బంది పెద్ద సంఖ్యలో పాల్గొన్నారు. దేశభక్తి నినాదాలతో కార్యాలయం మార్మోగగా, వేడుకలు ఉత్సాహంగా, క్రమబద్ధంగా సాగాయి.
