రెండేళ్ల కూటమి సుపరిపాలనను స్వాగతిద్దాం… విపక్షాల దుష్ప్రచారాలను భగ్నం చేద్దాం..!– తాలుకా జనసేన పార్టీ ప్రధాన సీనియర్ నాయకులు బి.సి. నాగరాజు

ఎమ్మిగనూరు టౌన్, జూన్ 15:రాష్ట్రంలో ఎన్డీఏ కూటమి ప్రభుత్వం రెండేళ్ల పాలనను విజయవంతంగా పూర్తి చేసుకున్న సందర్భంగా ప్రజలందరూ ఈ సుపరిపాలనను స్వాగతించాలని, విపక్షాలు చేస్తున్న అసత్య ప్రచారాలను తిప్పికొట్టాలని జనసేన పార్టీ తాలుకా ప్రధాన సీనియర్ నాయకులు బి.సి. నాగరాజు పిలుపునిచ్చారు.

సోమవారం విడుదల చేసిన పత్రికా ప్రకటనలో ఆయన మాట్లాడుతూ, ప్రధానమంత్రి నరేంద్ర మోదీ నాయకత్వంలో, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కళ్యాణ్, మంత్రి నారా లోకేష్ సమన్వయంతో రాష్ట్రంలో అభివృద్ధి, సంక్షేమం సమాంతరంగా ముందుకు సాగుతున్నాయని అన్నారు. “అభివృద్ధి – సంక్షేమం, రెండేళ్ల నమ్మకం” అనే నినాదంతో రాష్ట్రవ్యాప్తంగా నిర్వహిస్తున్న విజయోత్సవ కార్యక్రమాలు ప్రజల్లో విశ్వాసాన్ని మరింత బలోపేతం చేస్తున్నాయని పేర్కొన్నారు.

గత ప్రభుత్వ హయాంలో నిర్లక్ష్యానికి గురైన అనేక అభివృద్ధి పనులు ప్రస్తుతం వేగంగా పూర్తి అవుతున్నాయని, విద్య, వైద్యం, ఉపాధి, మౌలిక సదుపాయాలు, పారిశ్రామిక పెట్టుబడుల రంగాల్లో ప్రభుత్వం ప్రత్యేక దృష్టి సారించిందని తెలిపారు. ప్రజా సంక్షేమంతో పాటు రాష్ట్ర ఆర్థికాభివృద్ధికి కూడా ప్రభుత్వం కట్టుబడి పనిచేస్తోందని కొనియాడారు.

ప్రజలకు ఇచ్చిన హామీలను అమలు చేస్తూ పారదర్శక పాలన అందిస్తున్న కూటమి ప్రభుత్వానికి ప్రజల ఆశీర్వాదాలు ఎల్లప్పుడూ ఉండాలని కోరారు. రాష్ట్ర అభివృద్ధిని చూసి ఓర్వలేక కొందరు విపక్ష నాయకులు తప్పుడు ప్రచారాలకు పాల్పడుతున్నారని, ప్రజలు వాటిని నమ్మే పరిస్థితిలో లేరని అన్నారు.కూటమి ప్రభుత్వంపై జరుగుతున్న దుష్ప్రచారాలను జనసేన, టీడీపీ, బీజేపీ శ్రేణులు ఐక్యంగా తిప్పికొట్టాలని, ప్రభుత్వ విజయాలను ప్రజల్లోకి తీసుకెళ్లాలని పిలుపునిచ్చారు. రాష్ట్రాన్ని అభివృద్ధి పథంలో మరింత ముందుకు నడిపించేందుకు ప్రతి ఒక్కరూ కూటమి ప్రభుత్వానికి అండగా నిలవాలని బి.సి. నాగరాజు కోరారు.

ఈ కార్యక్రమంలో జనసేన పార్టీ నాయకులు పాల్గొని ప్రభుత్వ రెండేళ్ల విజయాలను ప్రజల్లోకి విస్తృతంగా తీసుకెళ్లేందుకు కృషి చేయాలని సంకల్పించారు. కూటమి ప్రభుత్వం చేపడుతున్న అభివృద్ధి, సంక్షేమ కార్యక్రమాలకు ప్రజల మద్దతు మరింత పెరగాలని ఆకాంక్షించారు.