- విరుచుకుపడిన ఉక్రెయిన్
మాస్కో: రష్యా అధ్యక్షుడు వ్లాదిమిర్ పుతిన్ ప్రభుత్వానికి అత్యంత కీలకమైన క్రిమియా వంతెనపై ఉక్రెయిన్ భారీ డ్రోన్ దాడులతో విరుచుకుపడింది. ఏకంగా 1,336 డ్రోన్లతో మాస్కోను లక్ష్యంగా చేసుకుంది. అయితే రష్యా రక్షణ వ్యవస్థలు 600కు పైగా డ్రోన్లను అడ్డుకున్నాయని మాస్కో మేయర్ సెర్గీ సోబ్యానిన్ వెల్లడించారు. రష్యా పెట్రోకెమికల్ ప్లాంట్, చమురు శుద్ధి కేంద్రం, సైనిక శిక్షణ కేంద్రంపైనా దాడులు జరిగాయి. క్రిమియా గవర్నర్ సెర్గీ అక్స్యోనోవ్ వంతెనపై దాడిని ధ్రువీకరించారు.
ఈ దాడుల దరిమిలా రహదారి, రైలు రాకపోకలు నిలిచిపోయాయి. సెయింట్ పీటర్స్బర్గ్, మాస్కో, అడ్లర్ నుంచి వచ్చే రైళ్లు రెండు నుంచి నాలుగున్నర గంటల వరకు ఆలస్యమయ్యాయి. కెర్చ్లో అత్యవసర నిర్వహణ కేంద్రాన్ని ఏర్పాటు చేసి, మరమ్మతులు ప్రారంభించారు.
ప్రాథమిక సమాచారం ప్రకారం ఎవరూ గాయపడలేదు. 2014లో క్రిమియాను రష్యా విలీనం చేసుకున్న తర్వాత పుతిన్ నిర్మించిన 19 కిలోమీటర్ల ఈ వంతెన ఆ దేశ ప్రాదేశిక హక్కులకు ప్రతీకగా నిలిచింది. రష్యా సైన్యానికి ఇంధనం, ఆయుధాలు, ఇతర సామగ్రిని చేరవేయడంలో ఇది కీలక పాత్ర పోషిస్తున్నది.