Acidity | ఎసిడిటీ, అజీర్తి సమస్యలు చాలామందిని వేధిస్తుంటాయి. ఛాతీలో మంట, కడుపు ఉబ్బరం, కడుపు నొప్పి, వికారం, భోజనం చేసిన తర్వాత కడుపు నిండుగా అనిపించడం వంటి లక్షణాలను చాలామంది సాధారణ జీర్ణ సమస్యలుగా భావిస్తారు. వెంటనే ఉపశమనం కోసం ఇంటి చిట్కాలు లేదా వైద్యుల ప్రిస్క్రిప్షన్ అవసరం లేని మందులను ఉపయోగిస్తుంటారు. అయితే అప్పుడప్పుడు వచ్చే ఎసిడిటీ, అజీర్తి సమస్యలు ఆహారపు అలవాట్లు, జీవనశైలిలో మార్పుల వల్ల వస్తాయి. కానీ తరచూ ఇలాంటి సమస్యలు ఎదురవుతుంటే వాటి వెనుక ఇతర అనారోగ్య సమస్యలు ఉండే అవకాశం ఉంది. గ్యాస్ట్రో ఈసోఫేజియల్ రిఫ్లక్స్ వ్యాధి (జీఈఆర్డీ), గ్యాస్ట్రైటిస్, కడుపులో పుండ్లు, కొన్ని సందర్భాల్లో జీర్ణవ్యవస్థకు సంబంధించిన క్యాన్సర్లు కూడా ఇందుకు కారణం అయ్యే అవకాశం ఉంది. అలాగే కొన్నిసార్లు గుండెపోటు లక్షణాలు కూడా అజీర్తి లేదా ఎసిడిటీ సమస్యల మాదిరిగా కనిపిస్తాయి.
కారణాలు ఏమిటి..?
అతిగా తినడం, సమయానికి భోజనం చేయకపోవడం, మసాలా లేదా అధిక కొవ్వు పదార్థాలు తీసుకోవడం, టీ, కాఫీలు ఎక్కువగా తాగడం, ధూమపానం, మద్యపానం వంటి అలవాట్లు ఎసిడిటీ, అజీర్తికి కారణమవుతాయి. ఒత్తిడి, నిద్రలేమి కూడా జీర్ణ సమస్యలను తీవ్రతరం చేస్తాయి. అయితే వారానికి రెండు, మూడు సార్లకంటే ఎక్కువగా ఎసిడిటీ రావడం, వారం రోజులకుపైగా సమస్య కొనసాగడం, ఆహారపు అలవాట్లు మార్చుకున్నా ఉపశమనం కలగకపోవడం, సాధారణ మందులు వాడినా ఫలితం లేకపోవడం వంటి పరిస్థితుల్లో వైద్యులను సంప్రదించాలి. ముఖ్యంగా 45 నుంచి 50 ఏళ్ల తర్వాత మొదటిసారిగా ఇలాంటి సమస్యలు రావడం, కుటుంబంలో జీర్ణవ్యవస్థ క్యాన్సర్ల చరిత్ర ఉండడం, తరచూ నొప్పి నివారణ మందులు, ఆస్పిరిన్ లేదా స్టెరాయిడ్లు వాడడం వంటి సందర్భాల్లో నిర్లక్ష్యం చేయకూడదు. మింగేటప్పుడు నొప్పి లేదా ఇబ్బంది, పదేపదే వాంతులు, వాంతుల్లో రక్తం, మలంలో రక్తం లేదా నల్లగా తారులా మలం రావడం వంటి లక్షణాలు కనిపిస్తే వెంటనే వైద్య పరీక్షలు చేయించుకోవాలి. కారణాన్ని బట్టి రక్త పరీక్షలు, అల్ట్రాసౌండ్ స్కాన్ లేదా ఎండోస్కోపీ పరీక్షలను వైద్యులు సూచిస్తారు.
గుండె సమస్యలు ఉంటే..
ముఖ్యంగా గుండెపోటు లక్షణాలను ఎసిడిటీగా పొరబడకూడదు. కొన్నిసార్లు గుండె సంబంధిత సమస్య వల్ల ఛాతీ లేదా పొత్తికడుపు పైభాగంలో మంట, అసౌకర్యం కలుగుతాయి. ఛాతీ నొప్పితో పాటు చెమటలు పట్టడం, శ్వాస తీసుకోవడంలో ఇబ్బంది, వికారం, తల తిరగడం లేదా నొప్పి ఎడమ చేయి, భుజం, వీపు, దవడ వరకు వ్యాపించడం వంటి లక్షణాలు ఉంటే వెంటనే అత్యవసర వైద్య సహాయం తీసుకోవాలి. ఎసిడిటీ అనుకుని యాంటాసిడ్ మందులు వేసుకుని వేచి చూడడం ప్రమాదకరం. అలాగే ఎసిడిటీ తగ్గించే మందులను వైద్యుల సలహా లేకుండా ఎక్కువ కాలం వాడటం కూడా మంచిది కాదు. ఇవి తాత్కాలికంగా లక్షణాలను తగ్గించినప్పటికీ అసలు సమస్యను గుర్తించకుండా చేసే అవకాశం ఉంటుంది. కొన్ని మందులు ఇతర దుష్ప్రభావాలకు లేదా వాడుతున్న ఇతర మందులతో ప్రతిచర్యలకు కారణం అవుతాయి.
జీవనశైలి మార్పులు అవసరం..
అప్పుడప్పుడు వచ్చే ఎసిడిటీ, అజీర్తి సమస్యలను తగ్గించుకోవడానికి కొన్ని జీవనశైలి మార్పులు చేసుకోవాలి. ఒకేసారి ఎక్కువగా తినకుండా కొద్దికొద్దిగా ఆహారం తీసుకోవాలి. రాత్రి ఆలస్యంగా భోజనం చేయడం మానుకోవాలి. ఏయే ఆహార పదార్థాలు తీసుకున్నప్పుడు ఎసిడిటీ పెరుగుతుందో గుర్తించి వాటిని పరిమితం చేయాలి. మద్యపానానికి దూరంగా ఉండడం, ధూమపానం మానేయడం, ఆరోగ్యకరమైన బరువును కొనసాగించడం మంచిది. భోజనం చేసిన వెంటనే పడుకోకూడదు. అయితే ఈ మార్పులు చేసినప్పటికీ సమస్య కొనసాగితే వైద్య పరీక్షలు చేయించుకోవాలి. ఎసిడిటీ, అజీర్తి సాధారణ సమస్యలే అయినప్పటికీ తరచూ ఎదురైతే నిర్లక్ష్యం చేయకూడదు. లక్షణాలకు తాత్కాలిక ఉపశమనం పొందడం కంటే వాటికి అసలు కారణాన్ని గుర్తించి సరైన సమయంలో చికిత్స తీసుకోవడమే ఆరోగ్యానికి మంచిదని నిపుణులు తెలియజేస్తున్నారు.