Balendra Shah: నేపాల్ ప్రధానమంత్రి బలేంద్ర షా రెండు రోజుల అధికారిక పర్యటన కోసం ఆదివారం భారత్లో అడుగుపెట్టారు. భారత ప్రధాని నరేంద్ర మోదీ ప్రత్యేక ఆహ్వానం మేరకు ఆయన ఆదివారం, సోమవారం (రెండు రోజుల పాటు) దేశంలో పర్యటించనున్నారు. 2026 మార్చిలో నేపాల్ ప్రధానమంత్రిగా పగ్గాలు చేపట్టిన తర్వాత బలేంద్ర షా చేపడుతున్న మొట్టమొదటి విదేశీ మరియు ద్వైపాక్షిక పర్యటన ఇదే కావడం విశేషం.
ఈ పర్యటనలో భాగంగా సోమవారం నాడు బలేంద్ర షా భారత ప్రధాని నరేంద్ర మోదీతో ఉన్నతస్థాయి ద్వైపాక్షిక చర్చలు జరపనున్నారు. అనంతరం రాష్ట్రపతి ద్రౌపది ముర్మును ఆయన మర్యాదపూర్వకంగా కలవనున్నారు. ఇరు దేశాల ప్రధానులు ద్వైపాక్షిక, ప్రాంతీయ మరియు అంతర్జాతీయ అంశాలపై సమగ్రంగా చర్చించిన తర్వాత సంయుక్త మీడియా సమావేశంలో పాల్గొంటారు. ఈ పర్యటన సందర్భంగా నేపాల్ ప్రధాని మరియు ప్రతినిధి బృందానికి ప్రధాని మోదీ ప్రత్యేక విందు ఏర్పాటు చేయనున్నారు.
బలేంద్ర షాతో పాటు నేపాల్ ఆర్థిక మంత్రి స్వర్ణిమ్ వాగ్లే, విదేశాంగ మంత్రి శిశిర్ ఖనాల్ సహా 34 మంది సభ్యులతో కూడిన ఉన్నతస్థాయి బృందం భారత్కు వచ్చింది. వాణిజ్యం, రవాణా, పెట్టుబడులు, ఇంధన రంగం మరియు సరిహద్దు కనెక్టివిటీని మరింత బలోపేతం చేయడమే ఈ పర్యటన ప్రధాన లక్ష్యం. ఇందులో భాగంగా విద్య, వైద్యం, వ్యవసాయం, విపత్తు నిర్వహణ తదితర రంగాల్లో ఇరు దేశాల మధ్య పలు కీలక అవగాహన ఒప్పందాలు (MoUs) జరగనున్నాయి. అంతేకాకుండా, నిర్మాణం పూర్తయిన కొన్ని అభివృద్ధి ప్రాజెక్టులను ఇరువురు ప్రధానులు సంయుక్తంగా ప్రారంభించనున్నారు.
శతాబ్దాల చారిత్రక, సాంస్కృతిక బంధాల పునాదిపై భారత్-నేపాల్ మధ్య స్నేహపూర్వక సంబంధాలు కొనసాగుతున్నాయని భారత విదేశాంగ మంత్రిత్వ శాఖ స్పష్టం చేసింది. భారత్ అనుసరిస్తున్న ‘నైబర్హుడ్ ఫస్ట్’ (పొరుగు దేశాలకు తొలి ప్రాధాన్యం) విధానంలో భాగంగానే ఈ పర్యటన అత్యంత ప్రాధాన్యత సంతరించుకుందని పేర్కొంది. తన రెండు రోజుల పర్యటనను ముగించుకుని బలేంద్ర షా సోమవారం రాత్రి తిరిగి కఠ్మాండుకు పయనమవుతారు.