Royal Enfield : ప్రముఖ ద్విచక్ర వాహన తయారీ సంస్థ రాయల్ ఎన్ఫీల్డ్ భారత మార్కెట్లో తన వ్యాపారాన్ని మరింత విస్తరించేందుకు సిద్ధమవుతున్నట్లు తెలుస్తోంది. ఇప్పటివరకు ప్రధానంగా 350CC నుంచి 650CC ఇంజిన్ సామర్థ్యం కలిగిన బైకులతో మార్కెట్లో ప్రత్యేక గుర్తింపు సంపాదించుకున్న ఈ సంస్థ.. ఇప్పుడు 250CC సెగ్మెంట్పై దృష్టి సారిస్తున్నట్లు సమాచారం. ముఖ్యంగా యువతను లక్ష్యంగా చేసుకుని తక్కువ ఇంజిన్ సామర్థ్యంతో కూడిన కొత్త మోడళ్లను తీసుకురావాలని యోచిస్తున్నట్లు ఆటోమొబైల్ వర్గాల్లో చర్చ జరుగుతోంది. ప్రస్తుతం భారత మార్కెట్లో 125CC కంటే ఎక్కువ ఇంజిన్ సామర్థ్యం కలిగిన బైకులపై వినియోగదారుల ఆసక్తి పెరుగుతోంది. రోజువారీ ప్రయాణాలతో పాటు లాంగ్ రైడ్స్కు కూడా అనువుగా ఉండే బైకులను కొనుగోలు చేసేందుకు యువత ప్రాధాన్యత ఇస్తోంది. ఈ మారుతున్న వినియోగదారుల అభిరుచులను దృష్టిలో పెట్టుకుని రాయల్ ఎన్ఫీల్డ్ 250CC విభాగంలోకి ప్రవేశించాలని భావిస్తున్నట్లు తెలుస్తోంది.
రాయల్ ఎన్ఫీల్డ్ కొత్తగా 250CC బైకులను తీసుకొస్తే కంపెనీకి మరింత విస్తృతమైన కస్టమర్ బేస్ ఏర్పడే అవకాశం ఉంటుంది. ప్రస్తుతం 350CC మోడళ్లను కొనుగోలు చేయాలనుకునే కొందరు వినియోగదారులు అధిక ధర, నిర్వహణ ఖర్చులు, ఇంజిన్ సామర్థ్యం వంటి అంశాలను పరిగణనలోకి తీసుకుంటున్నారు. అలాంటి వారికి 250CC బైకులు ప్రత్యామ్నాయంగా మారవచ్చు. తక్కువ ధరలో రాయల్ ఎన్ఫీల్డ్ బ్రాండ్ అనుభూతిని అందించడం ద్వారా తొలిసారి ప్రీమియం బైక్ కొనుగోలు చేయాలనుకునే యువతను ఆకర్షించవచ్చని కంపెనీ భావిస్తున్నట్లు సమాచారం. అయితే కొత్త బైకుల డిజైన్, ఇంజిన్ వివరాలు, ఫీచర్లు, ధర, లాంచ్ తేదీ వంటి అంశాలపై ఇప్పటివరకు అధికారిక ప్రకటన వెలువడలేదు. ఒకవేళ ఈ ప్రణాళిక కార్యరూపం దాలిస్తే భారత 250CC మోటార్సైకిల్ మార్కెట్లో పోటీ మరింత పెరిగే అవకాశం ఉంది.