Goldy Brar: అంతర్జాతీయ గ్యాంగ్స్టర్గా ఆరోపణలు ఎదుర్కొంటున్న గోల్డీ బ్రార్ కోసం కెనడా పోలీసులు గాలింపు ముమ్మరం చేశారు. అతడి ఆచూకీ తెలిపి అరెస్టుకు దారితీసే సమాచారం అందించిన వారికి ఏకంగా 2.5 లక్షల కెనడియన్ డాలర్ల వరకు (సుమారు రూ.1.63 కోట్లు) రివార్డు ప్రకటించారు. కెనడాలో అత్యంత కీలకమైన 25 మంది మోస్ట్ వాంటెడ్ నేరస్థుల జాబితాలో గోల్డీ బ్రార్ మొదటి స్థానంలో నిలిచాడు. నవంబర్ 19న టొరంటోలో నిర్వహించిన మీడియా సమావేశంలో బోలో ప్రోగ్రామ్ (BOLO Program) తన తాజా మోస్ట్ వాంటెడ్ జాబితాను విడుదల చేసింది. ఈ జాబితాలో గోల్డీ బ్రార్కు అగ్రస్థానం కేటాయించింది. కెనడా లేదా అమెరికాలో అతడి అరెస్టుకు దారితీసే సమాచారం అందించిన వారికి ఈ రివార్డు వర్తిస్తుందని ప్రకటించింది.
అసలు పేరు సతీందర్జీత్ సింగ్
గోల్డీ బ్రార్ అసలు పేరు సతీందర్జీత్ సింగ్. 2023 సెప్టెంబర్ 20న కెనడాలోని విన్నిపెగ్లో 39 ఏళ్ల సుఖ్దూల్ సింగ్ గిల్ హత్యకు సంబంధించి అతడిపై పోలీసులు కేసు నమోదు చేశారు. ఈ హత్యలో అతడి పాత్ర ఉందని ఆరోపిస్తూ దర్యాప్తు చేపట్టారు. విన్నిపెగ్ పోలీసుల ప్రకారం.. నగరంలోని ఓ నివాసంలో సుఖ్దూల్ సింగ్ గిల్ను కాల్చి చంపారు. ఈ కేసులో దర్యాప్తు అనంతరం 2026 ఫిబ్రవరి 23న గోల్డీ బ్రార్తో పాటు కరణ్బీర్ సింగ్పై ఫస్ట్ డిగ్రీ హత్య, హత్యకు కుట్ర వంటి అభియోగాలపై అరెస్ట్ వారెంట్లు జారీ చేశారు. అయితే నిందితులిద్దరూ ఇప్పటివరకు పోలీసులకు చిక్కలేదు.
ఎఫ్బీఐ నుంచి ఇప్పటికే రూ.9 కోట్లకు పైగా రివార్డు

అమెరికా ఫెడరల్ బ్యూరో ఆఫ్ ఇన్వెస్టిగేషన్ (FBI) కూడా గోల్డీ బ్రార్ కోసం గాలిస్తోంది. 2026 సెప్టెంబర్ 28న అతడిని ఎఫ్బీఐ టెన్ మోస్ట్ వాంటెడ్ ఫ్యూజిటివ్స్ జాబితాలో చేర్చింది. అతడి అరెస్టుకు దారితీసే సమాచారం అందించిన వారికి 1 మిలియన్ అమెరికన్ డాలర్ల వరకు (సుమారు రూ.9 కోట్లకు పైగా) బహుమతి ప్రకటించింది. లారెన్స్ బిష్ణోయ్ ఆర్గనైజ్డ్ క్రైమ్ గ్రూప్లో గోల్డీ బ్రార్ కీలక నాయకుడిగా వ్యవహరిస్తున్నట్లు ఎఫ్బీఐ ఆరోపిస్తోంది. ఈ గ్రూప్ అమెరికా, కెనడా ప్రాంతాల్లో లక్ష్యిత హత్యలు, కాల్పులు, బెదిరింపులు, బలవంతపు వసూళ్లు, మాదకద్రవ్యాల అక్రమ రవాణా వంటి నేరాలకు పాల్పడినట్లు అమెరికా అధికారులు పేర్కొన్నారు.
Goldy Brar: భారత్లోనూ పలు కేసుల్లో వాంటెడ్
గోల్డీ బ్రార్పై భారత్లోనూ పలు క్రిమినల్ కేసులు ఉన్నాయి. ప్రముఖ పంజాబీ గాయకుడు సిద్ధూ మూసేవాలా హత్య కేసులోనూ అతడి పేరు తెరపైకి వచ్చింది. ఈ నేపథ్యంలో భారత్, అమెరికా, కెనడా దర్యాప్తు సంస్థలు అతడి కోసం గాలిస్తున్నాయి. కెనడా బోలో ప్రోగ్రామ్ జాబితాలో అగ్రస్థానం, అమెరికా ఎఫ్బీఐ మోస్ట్ వాంటెడ్ జాబితాలో చోటు దక్కడంతో గోల్డీ బ్రార్పై అంతర్జాతీయంగా నిఘా మరింత పెరిగింది. అతడి ఆచూకీ కోసం ప్రజల సహకారాన్ని కోరుతూ రెండు దేశాల దర్యాప్తు సంస్థలు ప్రయత్నాలు కొనసాగిస్తున్నాయి.