Suryapet Road Accident: సూర్యాపేట జిల్లాలో తీవ్ర విషాదం చోటుచేసుకుంది. ద్విచక్ర వాహనంపై విధులకు వెళ్తున్న ఇద్దరు మహిళా ఉపాధ్యాయులను మృత్యువు టిప్పర్ లారీ రూపంలో కబళించింది. సూర్యాపేట మున్సిపల్ పరిధిలోని బీబీగూడెం సమీపంలో జరిగిన ఈ ఘోర రోడ్డు ప్రమాదంలో గురుకుల పాఠశాల ప్రిన్సిపాల్, ఓ ఉపాధ్యాయురాలు అక్కడికక్కడే ప్రాణాలు కోల్పోయారు.

Suryapet Road Accident: విధులకు వెళ్తుండగా ఎదురుగా వచ్చిన మృత్యువు
వివరాల్లోకి వెళితే.. చివ్వేంల మండలంలోని మినీ గురుకుల పాఠశాలలో కోట్ల రజిత ప్రిన్సిపాల్గా పనిచేస్తుండగా, అదే పాఠశాలలో గుగులోతు రక్మ ఉపాధ్యాయురాలిగా విధులు నిర్వహిస్తున్నారు. శుక్రవారం వీరిద్దరూ కలిసి ద్విచక్ర వాహనంపై సూర్యాపేట నుంచి చివ్వేంలలోని పాఠశాలకు బయలుదేరారు. ఈ క్రమంలో బీబీగూడెం సమీపానికి చేరుకోగానే, ఎదురుగా వేగంగా దూసుకొచ్చిన ఓ టిప్పర్ లారీ వీరి ద్విచక్ర వాహనాన్ని బలంగా ఢీకొట్టింది. ఈ ప్రమాద ధాటికి ఇద్దరూ తీవ్రంగా గాయపడి ఘటనాస్థలంలోనే తుదిశ్వాస విడిచారు.
ప్రమాదానికి కారణమైన టిప్పర్ లారీ ‘ఓ ఏ మిక్స్’ (OA Mix) కంపెనీకి చెందినదిగా గుర్తించారు. ఒకే పాఠశాలలో పనిచేస్తున్న ప్రిన్సిపాల్, టీచర్ ఇలా విధులకు వెళ్తున్న సమయంలో ఒకేసారి ప్రమాదంలో మృతి చెందడంతో పాఠశాల సిబ్బంది, విద్యార్థులు, మృతుల కుటుంబాల్లో తీరని విషాదం అలుముకుంది. సమాచారం అందుకున్న పోలీసులు ఘటనా స్థలానికి చేరుకుని మృతదేహాలను పోస్టుమార్టం నిమిత్తం సూర్యాపేట ప్రభుత్వ జనరల్ ఆసుపత్రికి తరలించారు. ప్రమాదానికి గల పూర్తి కారణాలపై పోలీసులు కేసు నమోదు చేసి దర్యాప్తు చేపట్టారు.