TVK MLA VS Babu : తమిళనాడు రాజకీయాల్లో విషాదం చోటుచేసుకుంది. ఇటీవల జరిగిన అసెంబ్లీ ఎన్నికల్లో మాజీ ముఖ్యమంత్రి, డీఎంకే అధినేత ఎం.కె. స్టాలిన్ను ఓడించి సంచలనం సృష్టించిన తమిళగ వెట్రి కళగం (టీవీకే) ఎమ్మెల్యే వి.ఎస్. బాబు (75) కన్నుమూశారు. కొంతకాలంగా అనారోగ్యంతో బాధపడుతున్న ఆయన చెన్నైలోని ఎంజీఎం హెల్త్కేర్ ఆసుపత్రిలో చికిత్స పొందుతూ గురువారం తుదిశ్వాస విడిచారు. గుండెపోటు రావడంతో మధ్యాహ్నం 2.24 గంటలకు మరణించినట్లు ఆసుపత్రి వర్గాలు అధికారికంగా వెల్లడించాయి.
వి.ఎస్. బాబు తన రాజకీయ ప్రస్థానాన్ని డీఎంకేతో ప్రారంభించారు. 2006 అసెంబ్లీ ఎన్నికల్లో పురసైవాక్కం నియోజకవర్గం నుంచి డీఎంకే అభ్యర్థిగా పోటీ చేసి ఎమ్మెల్యేగా ఎన్నికయ్యారు. అనంతరం 2016లో అన్నాడీఎంకేలో చేరారు. ఆ తర్వాత 2026 ఫిబ్రవరి 7న నటుడు విజయ్ స్థాపించిన తమిళగ వెట్రి కళగం (టీవీకే)లో చేరారు. అదే ఏడాది జరిగిన అసెంబ్లీ ఎన్నికల్లో కొలత్తూరు నుంచి పోటీ చేసి స్టాలిన్పై విజయం సాధించారు. ఈ ఎన్నికల్లో బాబుకు 82,997 ఓట్లు రాగా, స్టాలిన్కు 74,202 ఓట్లు వచ్చాయి. దీంతో 8,795 ఓట్ల మెజారిటీతో బాబు విజయం సాధించారు.
వీఎస్ బాబు మృతిపట్ల మాజీ ముఖ్యమంత్రి, డీఎంకే అధినేత ఎం.కే.స్టాలిన్ దిగ్భ్రాంతి వ్యక్తం చేశారు. వీఎస్ బాబు మరణ వార్త నన్ను తీవ్ర ఆవేదనకు గురిచేసిందని, ఆయన కుటుంబ సభ్యులకు నా ప్రగాఢ సానుభూతి తెలియజేస్తున్నానని ఎక్స్ లో పోస్టు పెట్టారు.
ప్రస్తుతం బాబు మురణంతో త్వరలో ఆ నియోజకవర్గంలో ఉప ఎన్నిక జరగనుంది. ఈ ఎన్నికల్లో మరోసారి ఎంకే స్టాలిన్ బరిలో నిలిస్తే మళ్లీ అసెంబ్లీలో అడుగు పెట్టే అవకాశం ఉంది.