తిరువనంతపురం: తారు మిక్సింగ్ ప్లాంట్ నుంచి కాలుష్యం వెదజల్లుతున్నది. దీంతో ఆ ప్లాంట్ సమీపంలోని స్కూల్కు చెందిన 62 మంది విద్యార్థులు అస్వస్థతకు గురయ్యారు. శ్వాస తీసుకోవడంలో ఇబ్బందులు, ఇతర ఆరోగ్య సమస్యలతో ఆసుపత్రిలో చేరారు. (School Students Fall Ill) కేరళలోని కొల్లాం జిల్లాలో ఈ సంఘటన జరిగింది. కొట్టియాంలోని తారు మిక్సింగ్ ప్లాంట్ నుంచి దట్టమైన పొగ, ఘాటైన వాసనలు వెదజల్లుతున్నాయి. ఈ కాలుష్యం కారణంగా బుధవారం ఆక్సిలియం ప్రైవేట్ పాఠశాలకు చెందిన 62 మంది విద్యార్థులు అస్వస్థతకు గురయ్యారు. శ్వాస తీసుకోవడంలో ఇబ్బందులతో పాటు పలు అనారోగ్య సమస్యలతో బాధపడ్డారు. బాధిత విద్యార్థులను ఆసుపత్రికి తరలించి చికిత్స అందిస్తున్నారు. ఈ సంఘటన నేపథ్యంలో ఆ స్కూల్లో క్లాసుల నిర్వహణను నిలిపివేశారు.
కాగా, బాధిత విద్యార్థులకు ప్రత్యేక వైద్య చికిత్స అందేలా చూడాలని జిల్లా వైద్యాధికారిని మంత్రి బిందు కృష్ణ ఆదేశించారు. అలాగే ఒక వైద్య బృందం ఆసుపత్రికి వెళ్లి వారి ఆరోగ్య పరిస్థితిని పరిశీలించాలని సూచించారు. అయితే జిల్లా కలెక్టర్, ఇతర ఉన్నతాధికారులు సంఘటనా స్థలాన్ని సందర్శించకపోవడంపై పాలక పక్షం సీపీఎంకు చెందిన యువజన విభాగమైన డెమోక్రటిక్ యూత్ ఫెడరేషన్ ఆఫ్ ఇండియా (డీవైఎఫ్ఐ) కార్యకర్తలు నిరసన చేపట్టారు. ఈ సంఘటనపై ఆందోళనకు దిగారు.
మరోవైపు కేరళ రాష్ట్ర మానవ హక్కుల కమిషన్ ఈ సంఘటనపై స్వయంగా కేసు నమోదు చేసింది. దీనిపై విచారణ జరిపి 15 రోజుల్లోగా నివేదిక సమర్పించాలని జిల్లా కలెక్టర్, కాలుష్య నియంత్రణ మండలి, పర్యావరణ ఇంజినీర్, పంచాయతీ కార్యదర్శిని ఆదేశించింది.
అయితే తారు మిక్సింగ్ ప్లాంట్ కారణంగా గతంలో కూడా ఇదే పాఠశాలకు చెందిన పలువురు విద్యార్థులు ఇలాంటి లక్షణాలతో అనారోగ్యానికి గురయ్యారు. దీంతో ఈ ప్లాంట్కు వ్యతిరేకంగా స్థానికులు నిరసన తెలిపారు. ఈ నేపథ్యంలో తారు ప్లాంట్ కార్యకలాపాలను నిలిపివేయాలని పంచాయతీ ఆదేశించింది. అయితే ఆ కంపెనీ హైకోర్టును ఆశ్రయించింది. ప్లాంట్ను తిరిగి తెరిచి నిర్వహించేందుకు అనుమతి పొందింది.