Diabetes | వయసు పెరిగే కొద్దీ మధుమేహం, అధిక కొలెస్ట్రాల్, అధిక రక్తపోటు రావడం సహజమని భావించకూడదని పోషకాహార నిపుణురాలు రాశి చౌదరి హెచ్చరించారు. ఈ మూడు సమస్యలు ఒకదానితో మరొకటి సంబంధం కలిగి ఉంటాయని, ఇన్సులిన్ నిరోధకత వీటికి ప్రధాన కారణాల్లో ఒకటిగా ఉంటుందని వివరించారు. ఆరోగ్యకరమైన ఆహారం, కండరాల బలోపేతం, శారీరక చురుకుదనం, క్రమం తప్పకుండా ఆరోగ్య పరీక్షలు చేయించుకోవడం ద్వారా ముప్పును తగ్గించుకోవచ్చని సూచించారు.
వృద్ధాప్యంలో ఈ సమస్యలు వస్తాయా..
వయసు పెరుగుతున్న కొద్దీ మధుమేహం, అధిక కొలెస్ట్రాల్, అధిక రక్తపోటు సమస్యలు రావడం సహజమేనని చాలామంది భావిస్తుంటారు. అలాగే ఇళ్లలో ఈ మూడు సమస్యలకు సంబంధించిన మందులు సాధారణంగా కనిపిస్తుంటాయి. అయితే వీటిని వృద్ధాప్యంలో తప్పనిసరిగా వచ్చే ఆరోగ్య సమస్యలుగా పరిగణించకూడదని పోషకాహార నిపుణురాలు రాశి చౌదరి సూచించారు. శరీరంలో ఇన్సులిన్ సక్రమంగా పనిచేయకపోవడం వల్ల రక్తంలో చక్కెర స్థాయిలు పెరుగుతాయని, దీనిని ఇన్సులిన్ నిరోధకత అంటారని వివరించారు. అధిక రక్త చక్కెర, ఇన్సులిన్ ప్రభావంతో కాలేయంలో ట్రైగ్లిజరైడ్స్, వీఎల్డీఎల్ వంటి కొవ్వు పదార్థాల ఉత్పత్తి పెరుగుతుందని, తద్వారా చెడు కొలెస్ట్రాల్ సమస్య ఏర్పడుతుందని తెలిపారు. రక్తనాళాల్లో కొవ్వు పేరుకుపోవడం వల్ల అవి గట్టిపడి, రక్తప్రసరణకు అడ్డంకులు ఏర్పడతాయని, ఫలితంగా గుండె రక్తాన్ని పంప్ చేయడానికి ఎక్కువ శ్రమించాల్సి వస్తుందని, రక్తపోటు పెరుగుతుందని వివరించారు.
వేర్వేరుగా చూడకూడదు..
ఈ మూడు సమస్యలను వేర్వేరుగా చూడకూడదని, వీటి మధ్య పరస్పర సంబంధం ఉందని రాశి చౌదరి పేర్కొన్నారు. రక్తంలో అధిక చక్కెర రక్తనాళాలను బలహీనపరుస్తుందని, కొలెస్ట్రాల్ రక్తనాళాల్లో అడ్డంకులు సృష్టిస్తుందని, అధిక రక్తపోటు గుండెపై ఒత్తిడిని పెంచుతుందని తెలిపారు. ఈ విధంగా ఒక సమస్య మరొక సమస్యకు దారితీసే ప్రమాదం ఉందని, ఈ చక్రం కొనసాగుతుందని హెచ్చరించారు. అందుకే రక్తంలో చక్కెర స్థాయిలను నియంత్రించడం, సమతుల్యమైన పోషకాహారం తీసుకోవడం, కండరాలను బలోపేతం చేసే వ్యాయామాలు చేయడం, శారీరకంగా చురుకుగా ఉండడంపై దృష్టి పెట్టాలని సూచించారు.
హెచ్బీఏ1సీ కీలకం..
అలాగే గత రెండు నుంచి మూడు నెలల సగటు రక్తంలో చక్కెర స్థాయిలను తెలియజేసే హెచ్బీఏ1సీ పరీక్షపై ప్రత్యేక శ్రద్ధ పెట్టాలని ఆమె సూచించారు. ఈ పరీక్షలో హెచ్బీఏ1సీ స్థాయి 5.6 శాతం కంటే తక్కువగా ఉండాలని రాశి చౌదరి పేర్కొన్నారు. అయితే హెచ్బీఏ1సీ స్థాయిలు మెరుగుపడ్డాయని భావించి వైద్యుల సలహా లేకుండా మందులను నిలిపివేయకూడదని స్పష్టం చేశారు. రక్తంలో చక్కెర, కొలెస్ట్రాల్, రక్తపోటును క్రమం తప్పకుండా పరీక్షించుకోవాలని, సమస్యలు తీవ్రమయ్యే వరకు వేచి చూడకుండా ముందుగానే జీవనశైలిలో మార్పులు చేసుకోవాలని సూచించారు.