షేర్: f 𝕏 ✉ ✈ in @
globaltimestelugu.in 15 నవం 2026, 8:41 ఉద.
క్రైమ్ వార్తలు

Train Track Blast : రాజస్థాన్‌లో రైలు పట్టాల పేలుడు వెనుక పాకిస్థాన్ కుట్ర? ఇద్దరు అరెస్ట్.. సంచలన విషయాలు!

World news in Telugu, you can trust
ప్రచురణ తేదీ: 15 నవం 2026, 8:41 ఉద. రచన: One News Desk
0 వ్యాఖ్యలు
Train Track Blast : రాజస్థాన్‌లో రైలు పట్టాల పేలుడు వెనుక పాకిస్థాన్ కుట్ర? ఇద్దరు అరెస్ట్.. సంచలన విషయాలు!

Train Track Blast : రాజస్థాన్‌లోని శ్రీగంగానగర్ జిల్లా రామ్‌సింగ్‌పూర్ ప్రాంతంలో నవంబర్ 3న రాత్రి సుమారు 9.45 గంటలకు రైలు పట్టాలపై భారీ పేలుడు జరిగిన విషయం తెలిసిందే. ఈ ఘటనలో రెండు రైల్వే స్లీపర్లు ధ్వంసమయ్యాయి. పట్టాలు దెబ్బతినడంతో పాటు సుమారు రెండున్నర అడుగుల లోతైన గుంత ఏర్పడింది. అయితే పేలుడు జరగడానికి సుమారు 75 నిమిషాల ముందే అదే మార్గంలో అనూప్‌గఢ్‌-సూరత్‌గఢ్‌ ప్యాసింజర్ రైలు వెళ్లినట్లు అధికారులు తెలిపారు. రైలు వెళ్లిన తర్వాత పేలుడు జరగడంతో పెను ప్రమాదం తప్పింది.

ఈ రైలు పట్టాలపై జరిగిన పేలుడు ఘటన వెనుక పాకిస్థాన్‌ హస్తం ఉన్నట్లు అనుమానాలు వ్యక్తమవుతున్న వేళ.. ఈ కేసులో కీలక పరిణామం చోటుచేసుకుంది. పాకిస్థాన్‌కు చెందిన హ్యాండ్లర్లతో సంబంధాలు ఉన్నట్లు అనుమానిస్తున్న పంజాబ్‌లోని గురుదాస్‌పూర్‌కు చెందిన మహక్‌దీప్ కౌర్(21), దేవీందర్ సింగ్‌ (22)ను రాజస్థాన్ యాంటీ టెర్రరిస్ట్ స్క్వాడ్ (ఏటీఎస్), పోలీసులు పంజాబ్‌లో అరెస్ట్ చేశారు. నిందితుల్లో ఒక మహిళ ఉన్నారు.

విచారణలో మహక్‌దీప్ కౌర్‌కు పాకిస్థాన్‌లో ఉన్న ఇద్దరు వ్యక్తులతో సంబంధాలు ఉన్నట్లు పోలీసులు గుర్తించారు. చాచా, షా అనే పేర్లతో వ్యవహరించే వ్యక్తులు ఆమెతో పరిచయం పెంచుకుని, ప్రేమ పేరుతో వలలోకి దించారని పోలీసుల ప్రాథమిక విచారణలో వెల్లడైనట్లు సమాచారం. అనంతరం డబ్బు ఆశ చూపి రైలు పట్టాలపై పేలుడు ఘటనకు సహకరించేలా ప్రేరేపించినట్లు అనుమానిస్తున్నారు. నిందితుల నుంచి రెండు తుపాకులు, 46 లైవ్ బుల్లెట్లు, రూ.30 వేల నగదును పోలీసులు స్వాధీనం చేసుకున్నట్లు తెలిసింది.

ఈ పేలుడు ఘటనలో సహకరించారనే అనుమానంతో మరో ముగ్గురిని కూడా పోలీసులు అదుపులోకి తీసుకున్నారు. నిందితులకు వసతి కల్పించడం, ద్విచక్ర వాహనం సమకూర్చడం, ఘటనాస్థలానికి చేరుకునేందుకు రవాణా సౌకర్యం కల్పించడం వంటి ఆరోపణలపై వారిని విచారిస్తున్నారు.

ఈ ఘటన వెనుక పాకిస్థాన్‌కు చెందిన హ్యాండ్లర్ల పాత్ర ఎంతవరకు ఉందనే కోణంలో భద్రతా సంస్థలు దర్యాప్తు చేస్తున్నాయి. పేలుడు కోసం నిధులు ఎక్కడి నుంచి వచ్చాయి? ఈ కుట్రలో ఇంకా ఎవరెవరు పాల్గొన్నారు? అనే అంశాలపై ఆరా తీస్తున్నారు.

#క్రైమ్వార్తలు #జాతీయం #పాకిస్థాన్
Train Track Blast : రాజస్థాన్‌లోని శ్రీగంగానగర్ జిల్లా రామ్‌సింగ్‌పూర్ ప్రాంతంలో నవంబర్ 3న రాత్రి సుమారు 9.45 గంటలకు రైలు పట్టాలపై భారీ పేలుడు జరిగిన విషయం తెలిసిందే.…